2018-09-15 0

【熱遊快報 – MHW歷戰王鋼龍】

【熱遊快報 – MHW歷戰王鋼龍】

芒亨WORLD 又有更新啦~
等咗好耐嘅歷戰王鋼龍終於登場,梗係唔少得新嘅鋼龍gamma裝啦~

叫得做歷戰「王」喎,梗係難打好多架啦!跟足5大必勝攻略,包你過到呀!

第一點:善用大爆G

接任嘅時候揀營地8,記住一出去唔好打佢住呀,等佢企定定響到,之後call齊班friend一齊放大爆G炸佢,一開頭就扣佢千幾血,打都打得快啲吖嘛!

第二點:善用閃光彈與爆烈結晶

條鋼龍最煩嘅就係會飛上天係咁出龍捲風同衝埋嚟,齋用閃光彈係閃唔到佢落地嘅,不過都可以照閃,因為佢會喺個天度暈下暈下,暈緊就唔會對人出龍捲風同四圍衝,仲有可以執地下啲爆烈結晶,喺鋼龍飛果陣扔疾佢cut佢技。溫馨提示︰爆烈結晶唔係成日執到,所以要留意下喇。

第三點:炎王龍爭地盤幫打

打到鋼龍轉區,炎王龍可能會出嚟爭地盤,打起上嚟,炎王龍會扣鋼龍幾千血㗎,記住到時叫埋班friend企埋一邊食住花生睇撕片,唔好行埋去呀,俾佢哋扣血就無謂啦!不過,兩條龍打唔打交係隨機嘅,睇彩數喇!

第四點:睇準時機落石

嚟到第三區,鋼龍會自己停係落石區架!所以唔駛心急衝落去住,去返營地1果條路落去,沿路會有石仔執,一落到去就可以落佢石㗎啦!如果唔好彩俾佢發現咗,都可以引返佢去落石位嘅,但麻煩啲囉!

第五點:用大爆G炸醒佢

當打到條鋼龍骷髏頭,就會返個巢瞓覺,所以又係時候用大爆G喇!其實條龍都幾慘,企係到又俾人炸,瞓覺又俾人炸,芒亨嘅世界都係弱肉強食㗎喇。

俾啲TIPS大家,放完大爆G,就可以叫齊啲friend著強打衣裝,之後係咁打頭,盡量打暈條鋼龍,唔好俾佢出到龍捲風啦,睇吓!啲龍捲風都幾麻煩。。。

可能經過貝布摩斯嘅洗禮,呢隻歷戰王鋼龍其實都唔太難打。

反而,今次套鋼龍gamma裝就夠晒勁,隻手有Lv2集中同3個Lv1洞,啱晒玩大劍同大鎚嘅朋友呀。

唔打算整成套裝,但又覺得個外型幾靚嘅,仲有套公會十字嘅外觀裝,套裝著上身成個刺客教條咁又幾好睇咁喎。但要拎到呢套裝,除咗要鋼龍票之外,仲要擊龍王硬幣,擊龍王硬幣就要上去集會區度打鬥技大會8同9。

嚟緊21號開始會有星辰際豐收之宴,會出返晒以往嘅所有活動,有咩未打嘅,記住打啦,bye bye~

去片~

發表迴響

你的電子郵件位址並不會被公開。 必要欄位標記為 *

分類
© Copyright 2018. 飯前一game. Designed by Space-Themes.com.